As Fillas de Breogán alzan un título que levaban nove anos sen catar, mentras que Keltoi repite dobrete nunha xornada con máis de 200 participantes
O pasado 25 de abril celebrouse na Fieiteira a Copa Galega de fútbol gaélico 2026, unha competición que reuniu a máis de douscentos futbolistas de toda Galicia en dúas categorías, feminina e masculina. Tras unha intensa xornada de competición nos campos sintético e natural das instalacións de Fieiteira, as Fillas de Breogán no feminino e Keltoi no masculino foron proclamados campiós desta edición da Copa Galega.
A competición feminina contou con oito equipos divididos en dous grupos, mentres que a masculina reuniu doce equipos en tres grupos, o que converte esta edición nunha das máis concorridas dos últimos anos no fútbol gaélico galego.
Feminino: As Fillas de Breogán levan a copa á Coruña
Na categoría feminina, as Fillas de Breogán demostraron a súa superioridade ao longo de toda a competición. Tras rematar en primeira posición do Grupo A con pleno de vitorias (3-0), as ártabras confirmaron o seu bo facer na fase final, vencendo primeiro ao Grovias nas semifinais por 11-2 e derrotando posteriormente ao Auriense na final por 19-8 tras un forte arranque na segunda metade. Trátase da segunda Copa Galega trala acadada no ano 2017 na Estrada.
O Auriense, que finalizou segundo no Grupo A, conseguiu o pase á final tras superar á Estrela Vermelha nas semifinais por 8-4, pero non puido frear o xogo das Fillas de Breogán na final.
Mención especial para as Lavandeiras de San Simón, que se proclamaron campionas do Shield tras derrotar ao combinado Turonia-Ártabras por 18-4 na final deste trofeo destinado aos equipos que non pasaron á fase final principal. Trátase do primeiro título oficial acadado polo novel club que debutou a tempada pasada.
Clasificación Final Feminina
1. Fillas de Breogán (Campioa)
2. Auriense (Subcampioa)
3. Estrela Vermelha / Grovias (semifináis)
5. Lavandeiras de San Simón (Campioa Shield)
6. Turonia-Ártabras (Subcampioa Shield)
7. Lorchas / Estrela Supernova
Resultados completos en Copa Galega 2026.
Masculino: Keltoi mantén o dominio
Na categoría masculina, o Keltoi confirmou o seu liderado no fútbol gaélico galego ao impoñerse de forma clara durante toda a competición. Os de Vigo remataron a fase de grupos con pleno de vitorias (3-0), mostrando un xogo dominante que lles levou a levantar o trofeo de campións. Nas semifináis voltaron cruzar caras co Estrela Supernova, clasificado como cuarto finalista como mellor segundo de grupo, aos que se imporon 19-6. Na final esperaba o Estrela Vermelha, reeditando a final da Copa 2025 e, ao igual que entonces, a victoria caeu do lado olívico por 15-8. Trátase do segundo dobrete Liga-Copa do Keltoi.
Os composteláns demostraron tamén o seu bo nivel nesta edición da Copa Galega, cun pleno de victorias na fase de grupos e impóndose ao Turonia Gondomar en semifináis por 8-3. Sen embargo, a final tivo dominio vigués, polo que o “rei de copas” (5 títulos para os estreleiros) terá que esperar para voltar a Compostela.
A alegría foi dobre no clube vigués xa que o seu filial, Keltoi Estibadores, acadaba a Copa Shield tras imporse na final a Fillos de Breogán, tras eliminar a Estrela Gaels e Lugh, os outros dous equipos clasificados para esta división intermedia. O cadro de honra complétao Lume de Beltane coa Copa Plate, terceira división en liza, ao imporse a Auriense.
Clasificación final masculina
1. Keltoi
2. Estrela Vermelha
3. Turonia / Estrela Supernova
5. Keltoi Estibadores (campión Shield)
6. Fillos de Breogán
7. Estrela Gaels / Lugh
9. Lume de Beltane (campión Plate)
10. Auriense
11. Lorchos / Tambo Islanders
Resultados completos en Copa Galega 2026.
Unha Copa Galega de consolidación
A Copa Galega 2026 pon de manifesto o crecemento sostido do fútbol gaélico en Galicia, cunha participación histórica tanto na categoría feminina como na masculina, sendo a de maior concurrencia dos derradeiros anos xuntando 8 equipos femininos, 12 masculinos e preto de 250 futbolistas en total. A competición, que se celebrou nunha única xornada nas instalacións de Fieiteira, serviu como preparación para os próximos retos da tempada e como escaparate do talento das e dos futbolistas galegos.
Destaca a participación de tres equipos compostos exclusivamente por futbolistas de categoría cadete: Estrela Supernova (categoría masculina e feminina) e Lugh (categoría masculina).
A próxima cita do fútbol gaélico galego será a vindeira fin de semana, fóra de terras galegas: Maastritch. Alí levarase a cabo o Campionato Europeo sub-15 “Feile”, no que dous destes equipos (Lugh no masculino e Estrela Supernova no feminino) soñan con traer o trofeo á casa. Precisamente o Estrela Supernova masculino xa sabe o que é iso, xa que son os vixentes campións.
